..د/عمر عبد الجواد عبد العزيز
قصتي من دمعتي لبسمتي
واحد كان ماشي في سكتي
قالي روحت أشتري رز بسمتي
شوفت السعر ..راحت بسمتي
و نزلت دمعتي
من هنا بدأت قصتي ......
ضحكت معاه رغم الآه
و مشيت علي هواه
و غيرت بسرعة لهجتي ...
قولت له بلدنا مرت بكتير صعاب
و شفنا أيام أسود من الهباب
من تسلل تكفيريين و إرهاب
و حتي الميه ...
الكل كان طمعان في حصتي ....
بلدنا كانت الوحيدة في العالم
اللي حدودها أنفاق
و دا كان بالاتفاق
و الكل كان عالم
مين المظلوم و مين الظالم
و اخدت يومها فرصتي ....
و حلفت ...
ما يدنس أرضي خسيس
سينا كانوا تركوها. للحشيش
و اللي يزرع كان لازم يدفع
بقشيش... لجل يسبوه يعيش
علي حساب جثتي .....
لحد. ما طهروها الرجال
وجبل الحلال... حرروه. أبطال
و لحد الآن ... في سينا الرمال
دم الشهدا يرويها
و معارك ما بتنتهيش
و ما بتلحق تجف دمعتي ....
و انت تكلمني عن السكر والزيت
و نسيت إنك بقيت
قاعد في أمان في البيت
ولا حد ييجي ناحيتك
ولا ناحيتي .....
و من فيرس سي
كتير كان محتاج علاج
تم بحمد الله شفاه
و بقي المرضي ما نلاقيش
و لا الجيش
تم تطويره و تزويده
و بقي زيوه في المنطقه مافيش .
لجل أنا و أنت في أمان نعيش
أنا عارف إن الأسعار بقت نار
من رز للحمه لخضار
وفواتير كهربا و ميه و ايجار
و الجنيه يا حيلة أبوه
كل شويه يعوموه
و اتبهدل أدام. الدولار
لكن انت نسيت العشوائيات
اللي كانت مأوي لتجار المخدرات
تم إزالتها و اتبني مكانها عمارات
في المقطم وغيط العنب و الأسمرات
و أنفاق تحت القناه
و عاصمة جديدة إدارية
و مدن كتير سكنية
من أسوان لإسكندرية
في طنطا و المنصوره و الغربية
و مدن صناعية للجلود و الأثاث
و بقت للصناعة أساس
و أراضي صحرا بقت زراعية
و طرق و كباري و قطار كهربائي
هيغطي الجمهورية
و مزارع أسماك و نخيل
منظرها يشفي العليل
و كمان صوامع غلال
و صوب زراعية ما كانت ع البال
و الكهربا بقت ١٠٠ ١٠٠
و نسيت حياه كريمة
بدل محلول ماما كريمة
و لا نسيت ياجدع
تطوير القري و تبطين الترع
و رغم أزمة الكورونا العالمية
و الحرب بين روسيا و أوكرانيا
مصر بخير ..و الحمد لله
إيه بقي لازمة الآه
و ليه الناس مش مقدره
و بقت عايشه حياتها متوترة
و كل السلع عندنا متوفره !!!
و اكتشافات كتير لبترول
و لسه الحال هيطول
و الكل أصبح يقول
مصر هتصدر غاز
و صبحت حقيقة مش ألغاز
والعالم كله لينا ينحاز
و عملنا القمة في شرم الشيخ
حضرها الرئيس والملك والشيخ
زي ما بدأ من مصر التاريخ
هتستمر علي الدوام قصتي
من دمعتي .......لبسمتي .
★★★★★★★★★★★