متابعه هيام محمود
لوليتا السينما اللى توجت على عرش النجومية فى السبعينات صاحبة الملامح الغربية اللى اكتشفها المنتج عدلى المولد و اختار اسمها الفنى العندليب عبد الحليم حافظ شاركت فى اول فيلم ليها الأصدقاء الثلاثة سنة 1966 و اول بطولة كانت فيلم أفراح سنة 1968 و بعدها قدمت مجموعة افلام زى روعة الحب و آخر الطريق و بداية السبعينات أصبحت اهم النجوم واعلاهم أجرا و يمكن كان أشهر ثنائى ليها مع الفنان الراحل محمود ياسين و اللى استمر من سنة 1971 لغاية سنة 1986 ومثلوا فيهم ١٩ فيلم كان من ضمنهم " حب و كبرياء _ بدور" وطبعا برغم موهبتها الشديدة لكن كانت دايما فى الفترة دى محصورة فى أدوار البنت الجميلة او الاستقراطية المدللة و مع بداية الثمانينات ولغاية أواخر التسعينات حاولت نزع الشخصية اللى حصرها فيها المخرجين فى الفترة دى وقدمت أدوار مهمة جدا زى عفوا ايها القانون و الفلاحة الساذجة الى سابها جوزها وهرب من اشتداد الفقر ثم تقتله فى النهاية فى فيلم لعدم كفاية الادلة و المرأة الحديدية و المعلمة الفاضلة فى ديسكو ديسكو والفنانة التشكيلة اللى هتتهم فى شريط اباحى فى اشتباه و زوجة سايس العربيات والخادمة فى الجراج
شاركت فى قائمة افلام ١٠٠ فيلم عربى حسب استفتاء النقاد سنة 1996 بثلاثة أفلام هما " اسكندرية ليه _ و أحلام هند و كاميليا _ و سوبر ماركت"
خاضت تجربة الانتاج مرة واحدة وكان سنة 1990 لما انتجت فيلم سوبر ماركت
اشتغلت مع كبار المخرجين زى حسام الدين مصطفى و نيازى مصطفى و يوسف شاهين و محمد خان و على عبد الخالق و أشرف فهمى
ترأست لجنة التحكيم فى مهرجان القاهرة السينمائى سنة 1998
اخر أعمالها كانت فيلم بطل من الجنوب و السهره التلفزيونية اللحظات الاخيرة سنة 2000 و اعتزلت بعدها التمثيل
أدوار كلها سابت أثر كبير اوى اوى وكانت كلها بتناقش قضايا كبيرة و حقيقى انا بشوف وطبعا ده مش تقييم لان محدش يقدر يقيم فنانة بقدر نجلاء فتحى انها بالاضافة لجمالها الشديد لكن هى من أهم النجوم واللى قدمت أدوار كتير نجحت على مستوى الجمهور و النقاد و برغم بعدها عن كل الأنماط الفنية لأكثر من ٢٠ سنة لكن تفضل من أهم الوجوه اللى مرت على السينما و اللى قدرت تقدم كل الأدوار بنجاح و تقمص رهيب