التعليم فى الصغر كالنقش على الحجر_مجلة أنا مصري

د/محمد القوصي

ابني عايز يشرب لأنه مش شايف إن فيه حكمة من العطش ...!!!

لو بنصوم لكى نحس بالفقراء ... فكفاية إننا ما ناكلش ، ليه ما نشربش ....؟؟

وبعدين الفقراء كمان بيصوموا... طب بيصوموا عشان يحسوا بمين ...؟؟؟

الحقيقة الولد عنده حق ...

فكرة إن الصيام هدفه إننا نحس بالفقراء فكرة غلط ١٠٠٪؜ ...

ما فيش آية في القرآن بتقول إننا  بنصوم لكى نحس بالفقراء ...

الفكرة دي بتطلع ملايين فاهمين إن الصيام مجرد تكدير وعكننة ...

شوية جوع وعطش وصداع... كان ممكن نحس بالفقراء بطريقة تانية غير كدا ...

ودي كارثة .. لأننا بنخسر الهدف الوحيد من الصيام ... 

ولما الهدف يضيع منك هتتعب أكتر لإنك مش فاهم حكمته ...

علم ولادك إن الصيام مفروض علينا لكى نتعلم نتحكم في شهواتنا ...

علم ولادك إن الصيام مفروض لكى ندرب أنفسنا على الصعب ...

علم ولادك إن الصيام بيمنعنا من شهوات حلال علشان بعد كدا ترك الغلط والمعاصي والحرام يبقي سهل ..

علم ولادك إن الصيام اللى بيمنعك من الحلال وانت بتقوله سمعًا وطاعة هو دا قمة الخضوع والاستسلام لله ...

علم ولادك إن التسليم المطلق لله من غير ليه وازاي هو ده اللى احنا اتخلقنا عشانه...

علمه من دلوقتي لأن الموضوع حيبقى أصعب بكتير لو كبر من غير ما يتعلم .