بقلم /محمد يونس
هسمع ياجدى كلامك
وابلغ الدنيا سلامك
ياللى نصايحك غالية
وعلى الفطرة
كانت امثالك وعلامك
فاكر لما قولت لى
خليك يابنى صاحى
لناس الدنيا..وماتدروشى
ان قولت ماتخافشى
وان خوفت ماتقولشى
وخلى كلامك صدق
وحاسب ..ماتكدبشى
ان جيت سيرة الناس
يالا قوم ..امشى
وكل عند ابنك
وعند بنتك ..ماتكولشى
ونام عند بنتك
وعند ابنك ..ماتنامشى
وبيت البخيل يابنى ..ماتدخولشى
واوعى شهادة الزور
وغير كلمة الحق ..ماتقولشى
وان جار عليك الزمان
خليك راجل ..ومتتكسرشى
هى الدنيا اية
غير عمل صالح
والكل هيسيبها..ويمشى
سرك مع امك
ومع حد تانى ..ماتفضفضشى
دة ابنك يابنى نور عينك
علية ..ماتبخلشى
وراعى شعور جارك
وبصوت عالى ..ماتزعقشى
وان دخلت بيوت الناس
عنيك فى الارض..ماتترفعشى
الجنة ببلاش..والنار بفلوس
اسمع كلامى وصدقة..وماتدلعشى
ويابخت اللى صاحبة راجل
وغير الراجل ..ماتصاحبشى
اوعى تصاحب اللى بالك فية
شورة الحريم..ماهتكسبشى
ويابختك ياللى مراتك
عاقلة وبنت ناس
وعلى اهلك ..ماتسلطكشى
نفسى احكى ياجدى
كلامك كمان وكمان
والحن واغنى على
الناى والكمان
الله عليك ياللى زمانك
كان زمان
تعالى اسمع وشوف
ناس بتحكى وتقول
ومابتتكسفشى
كفاية كدة ولا اقول تانى
ويارب الناس
منى ومن كلامى..ماتزعلشى