قصة من تأليف /أحمد حسن
اليوم 19/ 7/ 2010
ده اخر يوم في حياتي ........ السبب الفضول
أنا مهران من أسيوط أسرتي مكونة من 3 أفراد أنا وأمي وأختي والدي متوفي من 4 سنين أنا الكبير 26 سنة أختي هبة 22 سنة بعد مااتخرجت من كلية التجارة طبعا وكالعادة مالقتش اي شغل .
وفي مرة قابلت دكتور من الدكاترة بتوعي في الكلية دكتور مدحت لما شافني وقف بالعربية سلم عليا وسألني شغال ايه ؟
قلتله مش شغال قاللي يابني انت كنت متفوق في الكلية واعتقدت انك هتبقي معيد في الكلية فرديت وقلتله انا كنت الثالث علي الدفعه لكن انت عارف بقي بلدنا واللي بيحصل فيها .
قاللي هات رقمك وكلها كام يوم وهكلمك وان شاء الله خير
طبعا كان كل تفكيري ان كده كده هينسي وقصة وانتهت .
4 ايام عدوا ولقيت رقم غريب بيرن عليا مرة و2 و3 و4 رديت في المرة الخامسة والمكالمة كانت كالاتي :
هو : السلام عليكم .
انا : وعليكم السلام مين معايا ....؟
هو : انا دكتور مدحت .
انا : اهلا وسهلا يادكتور انا اسف مردتش من اول مرة عالموبايل مكنش معايا .
هو : ولا يهمك خلينا في المهم انا مضيتلك من رئيس الجامعة انك تشتغل كموظف في المستشفي الجامعي ومتقلقش مش عقد وكده هتتثبت علي طول الكوسة اللي ضايقتك من حاجة اهي مشيت معاك .
وقعدنا نضحك وشكرته كتير
وقاللي : لو احتجت اي حاجة كلمني علي طول والمهم اول يوم في الشهر ابقي قابلني عند كتب مدير المستشفي علشان الطلب بتاعك معايا وانا هدخل معاك اوصي عليك .
رحت في المعاد واتقابلنا ودخلنا سوا ومدير المستشفي استقبلنا افضل استقبال وشربنا الساقع وتمام وسابنا الدكتور مدحت عند الدكتور سيد مدير المستشفي .
بعد كده قاللي الدكتورسيد : انا مش عارف اشغلك في ايه .
وقعد يفكر لحظات كده وفالاخر قال : اه فكرة احنا عايزين نريحك علشان التوصيتين اللي عليك .
قولتله : طيب واحدة الدكتور مدحت والتوصية التانية من مين ؟
قاللي : رئيس الجامعة في الطلب كاتب كلمتين زي الفل وعلي فكرة مفيش حد بيتثبت كده من غير مايقعد 3 سنين عالاقل مؤقت .
قولتله : طيب الحمد لله .
قاللي : المهم ا/ ياسر المسئول عن المشرحة فاضله 3 شهور علي المعاش المهم انت ساكن فين ؟
قولتله عالمكان وكان قريب جدا من الجامعة ففرح قاللي: تمام أوي علشان لو اي وقت احتجناك نلاقيك حوالينا علشان المشرحة ملهاش مواعيد وانا برضه مش هخليهم يدققوا معاك في الحضور والانصراف المهم موبايلك يبقي شغال 24 ساعة اي وقت نتصل نلاقيك هنا .
انا في بالي قولت مشرحة مشرحة احسن من بلاش .
ونزلت قابلت عم ياسر راجل كبير باقي له 3 شهور ويتم 60 سنة ويطلع معاش راجل طيب جدا حسيت انه زي ابويا وقعدنا نتكلم عن حياتي وحياته وبدأنا نتكلم عن طبيعة الشغل .
قاللي : يابني المهم انك تشتغل بالورق دخول جثة بالورق خروج جثة بالورق مفيش دكتور ولا ممرض يقولك دخل دي او خرج دي وابقي اجيبلك الورق بعدين ممكن تشيل مصيبة واديك هتشوف تعاملي ازاي معاهم ومع اهل المتوفي .
اول جثة كانت بعد 3 ساعات دخل علينا العامل ومعاه اهل المتوفي وراني اكتب ازاي فالدفتروفتحت الثلاجة هي باردة جدا ومخيفة جدا تحس ان الضلمة بتهجم عليك حتي وانت منور النور تحس ان الضلمة هاجمة علي النور بالعة النور جواها .
حطينا الجثة في الثلاجة علي اهل المتوفي مايخلصوا تصريح الدفن وشهادة الوفاة من مكتب الصحة .
لقيت عم ياسر بيقولي : لو حد حب يغسل ابوه ولا حد من اهله هنا عادي لكن بشرط تكون انت موجود معاهم علشان محدش يسرق اي حاجة من اي جثة اما لو ست يبقي ياخدوها يغسلوها في بيتهم لإنك مش هينفع تبقي جوه ومش هينفع تسيبهم لوحدهم .
عدي يوم والتاني والتالت وكل يوم اجي الصبح الاقي عم ياسر شكله مش نايم كويس لما أسأله
يقوللي : اتصلوا بيا مرة وساعات مرتين علشان في حالات وفاه او ناس جاية تستلم الجثث بتاعت قرايبهم .
وكل مرة اقوله : ياعم ياسر اتصل بيا انزل انا او عالاقل انزل معاك .
يقوللي : انت مستعجل علي ايه مابكرة تشتغل لوحدك .
ولما بزن عليه يقولي حاضر ربنا يسهل ومايتصلش .
مرة كانت الساعة تقريبا 12:30 بالليل قولت اتصل بيه ابلغه اني هغيب بكرة علشان عندي مشوار مهم اتصلت لقيت صوت واحدة عجوزة هي اللي بترد وعرفت انها مراته ولما سئلتها عنه
قالت : هو لسه نازل حالا عالمستشفي علشان هيسلم جثة ونسي موبايله هنا .
نزلت وركبت العجلة بتاعتي وجريت علي هناك اول ماوصلت كان هو ورايا علي طول .
ولقيته بيقوللي بنرفزة : انت ايه اللي جابك دلوقتي ؟
حكيتله اللي حصل لقيت وشه اتغير وبيقولي بزعاق: براحتك براحتك .
قولت في بالي : هي ايه الحكاية هو بيبيع جثث وخايف اني اكشفه ولا ايه؟
المهم سلمنا الجثة للناس كانت الساعة 1:15 صباحا تقريبا.
وعمال يقولي : يلا نمشي يلا نمشي .
طب نشرب كوبايه شاي وهو يرفض .
قولتله : بص ياعم ياسر امشي انت انا هاقعد واشرب شاي .
قاللي: خلاص امري لله هاقعد معاك .
عدت تقريبا ربع ساعة واحنا قاعدين في المكتب بتاعنا اللي قدام المشرحة عملت الشاي ويادوب لسه هاشرب وسمعت زغروطة عالية جدا ودي حاجة اول مرة اسمعها هناك دايما اسمع صوت صراخ ونحيب مع كل جثة فابتسمت وعم ياسر وشه اتغير مش عارف ليه ؟
انا قولت :يمكن مريض اتكتبله خروج واهله فرحانين بيه .
الزغاريط كل لحظة بتزيد وفي اصوات اطفال بتلعب وفرحانة وقفت علي باب المكتب لقيت مفيش اي حد خالص والصوت جاي من ناحية المشرحة فجأة عم ياسر مسك ايدي .
وبيقوللي : يالا نروح بقي كفاية كده .
قولتله : ياعم ياسر انا مش همشي انا هقعد شوية .
قاللي : ليه ؟
قولتله : علشان اعرف مصدر الصوت .
انا قولت الجملة دي وفجأة قطع صوت الزغاريط وصوت الاطفال صرخة قوية جدا برضه من المشرحة وسكتت الاصوات كلها .
قولتله : ياعم ياسر هو في حد عايش في التلاجة ولا ايه في حد مامتش وفكروه ميت ودخلوه في التلاجة ؟
ومسكت المفتاح ورايح ناحية المشرحة لقيت عم ياسر خطف مني المفاتيح
وبيقوللي :لا مش هتروح انا هقولك سبب منعي ليك انك تيجي بالليل
من سنتين في واحد ساحر بتاع سحر اسود واعمال مات ومحدش من اهله رضي يدفنه ولا حتي مقابر الصدقة ومن يومها وهو موجود في المشرحة في التلاجة رقم 5 ومن يومها والاصوات دي من الساعة 1:30 بالليل وحتي اذان الفجر ومهما حصل مش بادخل المشرحة في الوقت ده والسبب اني لما سئلت كذا شيخ .
قالولي : ابعد عن المكان وقت وجود الاصوات مهما سمعت ابعد.
وكمل كلامه وقال : كنت باسمع ساعات ناس بتنادي عليا وساعات اصوات عيال صغيرة .
انا : من جوايا مش مصدق ولا حرف من كلامه وفجاة سمعت صوت
بيقول : مهران افتحلي يامهران وانا افتحلك ابواب الكنوز .
قولتله : انت سمعت اللي انا سمعته ؟
قاللي : لا . بس اكيد سمعت صوت بيناديك وبيقولك عن كنز كنوز حاجة زي كده .
قولتله : بس يبقي اكيد انت كمان سمعت .
قاللي : لا والله بس انا باسمع ده كل يوم وهو بينادي باسمي وباعمل مش سامع لحد ماحصل شيئ غريب قبل ماتيجي هنا بيوم سمعت صوت بيقولي انت ضيعت كنز من ايدك بس مهران مش هيعمل زيك انا معرفش مين مهران الا لما لقيتك داخل عليا وبتعرفني بنفسك وطبعا لو كنت قولتلك وقتها ماكنتش هتصدق وكنت هتفكرني باطفشك بص يابني علشان ربنا يحفظك منه اعمل زيي واياك وعلي الله ولو حصل ايه ولو في100 ميت مش بافتح الثلاجة وباتلكك باي حاجة لحد الفجر مايقول الله اكبر
مرة واحدة بس فتحت تحت الحاح شديد ودخل واحد ياخد جثة ابوه ومعاه فرد من الامن وهو اللي اخد مني المفتاح غصب عني قولتله وبعدين
قاللي : فرد الامن محجوز حاليا من سنة ونصف في قسم النفسية والعصبية
والابن طلع شايل جثة ابوه وبيجري وفجأة وقع ووقعت منه جثة ابوه
بسئله مالك قاللي احنا فتحنا باب الجحيم ومات بجوار جثة ابوه
انا بقيت اسمع واستغرب واقول ياتري الكلام ده بجد ولا ايه سمعت صوت تاني بيقولي :متصدقوش ده كداب ده كداب ده كداب هو جبان انا بسمع الكلام ده وعم ياسر بيتكلم بس مش فاهم بيقول ايه
في لحظة سحب ايدي وقاللي يالا ومشينا انا وهو وكل واحد روح علي بيته
مكدبش عليكوا انا مش بصدق في قصة السحر والعفاريت انا عارف انه مذكور في القران بس كنت فاهم ان القصة دي كانت زمان بس حاليا مش موجود وكان قراري اني هدخل المشرحة وهشوف الجثة بس في وقت النهار وبعدها هقرر هعمل ايه بعد مافطرت انا وعم ياسر وشربنا الشاي بلغته قراريي وهو حاول يمنعني بس كنت مصمم وقولتله : انت مش بتقول الخطر بالليل ايه المشكلة بقيي عايز اشوف شكله قاللي خلاص هدخل معاك ونخرج بسرعة قولتله ماشي .
المهم دخلنا كانت الساعة 10:15 صباحا تقريبا فتحنا باب المشرحة ونورنا النور وكان تركيزي علي ثلاجة رقم 5 اللي فيها الساحر اول مادخلنا الباب اتقفل علينا من بره حاولنا نفتح الباب معرفناش نفتحه نخبط محدش سمعنا الموبايلات مفيش شبكة فجأة النور قطع اترعبنا ومسكنا ايدين بعض وفجاة سمعت صرخة اغمي عليا فيييها معرفش غبت عن الوعي قد ايه بس فقت لقيت نفس مكاني وعم ياسر جنبي وببص في الموبايل لقيت الساعة 01:28 صباحا فاضل دقيقتين والرعب يبدا معرفش ازاي محدش سأل فينا الوقت ده كله المهم صحيت عم ياسر صحي بيقولي احنا فين قولتله في المشرحة وفاضل دقيقتين لازم نخرج فيهم النور جه فاللحظة دي ولقينا بقعة دم كبيرة جدا بس مش نازلة من تلاجة في نص المشرحة بالظبط يعني مش عارف جاي منين بالظبط فجأة باب الثلاجة رقم 5 بيتفتح وبيخرج منه ايد كلها شعر.
عم ياسر بقي يردد سلاما قولا من رب رحيم وانا عايز اردد وراه ومش قادرر لساني معقود لقيت الثلاجة اتفتحت وخرج منها شخص اسود وفي منتهي البشاعة
بصلي وضحك وبص لعم ياسر بصله بصة كره وفجأة تحول لوحش يشبه الغوريلا أو مش عارف هو إيه شئ مرعب وضخم وعينه حمرة بلون الدم وبتلمع في الضلمة بلمعه مرعبة فجأة هجم علي عم ياسر قطع جسمه كله وعم ياسر بيصرخ وأنا مش قادر أتحرك ولا أقربله خالص خلاص عم ياسر مات فوجئت بيه بيبصلي وبيشاورلي تحت رجلي لقيت صندوق صغير مكتوب عليه مهران شاورلي عالباب لقيته إتفتح خرجت جري ومعايا الصندوق خرجت لقيت جثة عم ياسر في وشي بره إتخضيت وجريت بالعجلة بتاعتي ومحدش شافني روحت البيت حطيت الصندوق في الدولاب وقفلت عليه ومعرفتش أنام كل مغفل 5 دقايق أصحي علي كوابيس إن في تعابين بتخرج من الدولاب مكان الصندوق وبتلف عليا بتخنقني فجأة الموبايل رن لقيت واحد زميلي بيقولي : عم ياسر مات
قلتله : مات إزاي ..؟؟
قاللي : جاتله أزمة قلبية ومات
قلتله : هو فين ..؟؟
قاللي : هو مات جنب المشرحة لكن دلوقتي في بيتهم
أخدت العنوان وجريت علي هناك وقابلت أهله وطلبت منهم إني نفسي أودعه ووافقوا ودخلت وصعقت لحظة ملقيت جسمه سليم تماما
قررت أفتح الصندوق وأشوف فيه إيه رحت و قفلت الباب عليا وخرجت الصندوق من الدولاب هو صندوق خشب ريحته إنه خشب قديم قوي لحظة مفتحته سمعت أصوات كتيرة وغريبة صراخ وزغاريط وضحك خرجت بره لقيت أمي وأختي قاعدين عادي ومسمعوش حاجة عملت نفسي بشرب ميه ودخلت تاني والصراخ لسه زي ماهو لقيت ورقة صفراء وقديمة جدا مكتوب فيها أوعي تعمل زي ياسر
ياسر لقي الصندوق وولع فيه علشان كده كان لازم يموت هات الأشياء المطلوبة في الورقة حتي تحرر روحي وأكون لك خادم وأي طلب تطلبه ولو أردت أن تكون ملكا لكل الدنيا لجعلتك فعلا وكانت الطلبات كالآتي
دم بني آدم
عين بني آدم
خصلات شعر من مهران
لما تجيب الطلبات هتلاقي ورقة تانية بالأوامر الجديدة
أمامك فجرين يمروا عليك وإلا هتلاقي مصير ياسر
بدأت أفكر ياتري هعمل وهنفذ ولا لأ
مش عارف مش عارف مش عارف
نمت ومفيش في بالي غير الموضوع ده لما صحيت إفتكرت الشيخ محسن
ده راجل شيخ قريبنا بيعالج بالقرآن رحت عنده البيت وحكيتله الموضوع علي إنه يخص واحد صاحبي قاللي قول لصاحبك : ده ساحر كان مخاوي شيطان ولما الساحر مات الشيطان إتحبس معاه في الثلاجة وهو عايز يطلع بأي طريقة لكن تقريبا هو عايز يلبس صاحبك ويخرج للعالم في هيئته ولو صاحبك عمل كده مش هيعرف يتصرف بعدها خالص خليه يولع في الصندوق زي عم ياسر والشيطان مش هيعرف يإذيه طالما مش بيدخل المشرحة في الأوقات اللي فيها الأصوات دي لكن لو فضل يبقي يا ويله من اللي هيحصله من الشيطان ده
مقتنعتش قوي بكلام الشيخ محسن وقررت إني هعمل المطلوب وهخليه خادم ليا ويحققلي كل أمنياتي
موضوع الطلبات أسهل ما يكون
دخلت بنك الدم عند أ/عبد الله قعدت أتكلم معاه ووسط مهو بيكلم الناس قاللي : هروح الحمام وجاي خللي بالك من المكان
أول مراح حطيت كيس دم من الثلاجة فكيس أسود كان معايا وأول مرجع قلتله : أنا ماشي علشان كلموني عالموبايل علشان في حالة وفاة عند المشرحة وسبته ومشيت
دخلت المشرحة وبدأت أدور في الكشوفات مين ميت قريب ومجهول محدش سأل عليه خالص لقيت جثة واحدة ست تقريبا 26 سنة ومحدش سأل عليها خالص دخلت وفإيدي مشرط ومعرفش إزاي ومديت إيدي جوا عنيها وشديتها لبره لقيت زي عرقو واصله بين العين والجسم قطعت العروق بالمشرط وحطيت العين مع كيس الدم وروحت عالبيت علي طول وأنا حاسس إن الناس كلها بتبص عليا وأنا ماشي زي ميكون عارفين أنا معايا إيه . دخلت البيت وفورا عالاوضه وقفلت الباب عليا وفتحت الدولاب وجبت الصندوق وفتحته ولقيت ورقة تانية غير الأولي مكتوب فيها الآتي :
تذهب للمقابر عند منتصف الليل وتعمل نجمة خماسية بالدم وتكون حاطط وسط الدم بعض من خصلات شعرك وبعدها تقول هذه الكلمات وإنت حاطط العين الآدمية علي عينك ستري كل شئ : أنا وهبتك نفسي لتدخلها فهيا معا إلي الحياة الأبدية ترددها سبع مرات
ملحوظة : إياك ثم إياك من الخروج من النجمة حتي أحضر أنا ستعرفني عندما تراني
دلوقت الساعة 11:30 مساءا أنا في المقابر بدأت أعمل النجمة بالدم ومعها خصلات من شعري زي ممكتوب بالظبط ووقفت في نص الدايرة وحطيت العين علي عيني حسيت إن في حاجات ماشية حواليا بس حاجات غريبة وهادية جدا زي ميكون أرواح أو حاجة مش عارف بس ماشيين بهدوء غريب كإنهم مجموعة ناس يتسامرون بدأت أقول الكلام وأنا عين من عنيا عالورقة والعين التانية محطوط عليها العين الآدمية بشوف بيها المنظر لقيت الحاجات اللي كانت ماشية حواليا بتجري ولقيت القبور بتنبش وأصوات وصرخات بدأت تطلع من جوه القبور وظلال كتير بدأت تتجمع حواليا فجأة شيلت العين من علي عنيا لقيت الدنيا ضلمة ومفيش أي حاجة غير الأصوات حطيتها تاني لقيت حواليا 12 شكل مرعب أطوال مختلفة في طويل قوي وفي قصير قوي وفي وسط عينيهم حمره بلون الدم بتلمع في الضلمة بشكل مرعب وكإنهم عايزين ياكلوني كل ميقربوا مني تحصلهم حاجة زي كهربا كده تمنعهم من الدخول جوه النجمه ويزيد صراخهم أكتر كل لحظة بدأت أردد الجملة : : أنا وهبتك نفسي لتدخلها فهيا معا إلي الحياة الأبدية
أول مقلتها المرة السابعة لقيت زي تشريفة جاية من بعيد أنوار كتير واللي حواليا زي ميكون حضور التشريفة بيعذبهم بدأوا يصرخوا بصوت عالي لدرجة إن وداني وجعتني جدا وفي منهم اللي وقع وكإنه مستحملش حضور التشريفة كل ده أنا شايفه ومرعوب ومش عارف أعمل إيه ولا أتصرف إزاي ..؟؟
فجأة ظهر الشيطان بنفس الشكل اللي شفته بيه في المشرحة زي غوريلا بس مرعبة مش زي بتاعة جنينة الحيوانات
بصلي وضحك وقال : أهلا بخادمي مروان
قلتله وأنت بتلعثم : خا .. خادمك إزاي مش المفروض إنت خادمي ..؟؟
ضحك ضحكة شريرة هزت المقابر كلها وقال : إنت اللي خادمي من النهاردة إنت خادمي وعبدي ومحدش هيقدر يإذيك لا إنس ولا جن إرحل الآن وكل من حولك الآن لن يستطيعوا أذيتك سأراك قريبا جدا لكن أترك العين والصندوق وسط النجمة و أرحل
فجأة كل شئ إختفي ومشيت وأنا مش عارف أعمل إيه
رجلي أخدتني لبيت الشيخ محسن ولما حكيتله اللي حصل
قاللي : مين قالك تعمل كده أنا مش قلتلك إبعد
بدأ الشيخ محسن يقرأ عليا قرآن وأنا بسمع حاسس إن في حاجات جوايا بتتقطع وفجأة ظهر الشيطان من ورا الشيخ محسن وأنا عايز أحذره بس لساني معقود وجسمي مشلول وفجأة الشيطان دخل جوايا وشفت نفسي وأنا بخنق الشيخ محسن وبمسك سكينة وبدبحه بيها لا لا لا مش أنا اللي بعمل كده ده اللي دخل جوايا بس بإيديا أنا
وفجأة سمعت صوته من جوايا بيقول بغضب : إياك تكرر فعلتك حتي لا تنتهي حياتك
رجعت البيت جري ودخلت أوضتي ونمت وبدأت أحلم بكل شئ حصل أخدت باللي إني وأنا شايف إني بخنق الشيخ محسن كان بيحاول يتكلم قربت منه علشان أسمع
سمعته بيقول : شيطانك قوي هيهددك إنه هيموتك ومستحيل يعملها لإن بموتك هيرجع تاني يتحبس مع الساحر في الثلاجة علشان حد يخرجه غيرك موتك هو الحل يا مروان موتك هو الحل
صحيت من النوم مفزوع وزادت فزعتي لما لقيته قدامي
وبيقوللي : أهلا بخادمي مروان
قلتله : لا أنا مش خادم ليك ولا لغيرك وإعمل اللي إنت عايزه
قاللي : هقتلك
قلتله : هههههه مش هتقدر لإن وجودك هنا مرتبط بحياتي
لقيته بصلي بغضب شديد ودخل جوايا تاني وشفت نفسي بدخل أوضه هبه وفإيدي سكينة وبقرب منها وبدبحها برده لاإراديا فجأة لقيت أمي بترخ وأغمي عليها وهو ظهرللي في اللحظة دي
وقاللي : لو مبقتش الخادم بتاعي هموت أمك وهموتك إنت كمان
قررت إني هنفذ كلام الشيخ محسن أموت نفسي بس إزاي وأنا إتهموني إني جاتلي لوثة عصبية لما حكيتلهم اللي حصل ودلوقت في مستشفي الأمراض العقلية وأنا قلت مجنون مجنون أحسن من الإعدام
طبعا إنتوا دلوقتي مستغربين إزاي بكتبلكم و أنا بموت وأنا برضه في المستشفي
أنا محجوز في المستشفي اللي شغال فيها في قسم النفسية والعصبية في ناس كانت بتيجي تزورني كان منهم أ/عبدالله بتاع بنك الدم حكيتله الحكاية كلها وصدقني لإن عم ياسر كان حاكيله كل حاجة عن قصة الساحر و الأصوات ولما قلتله إن الحل هو موتي وعايزك تجبلي سم رفض طبعا وقاللي نحاول مع شيخ وإثنين وثلاثة قعدت أبكي
وقلتله : إنت مش عارف بيعمل فيا إيه كل ليلة
صعبت عليه وقرر يساعدني وقاللي هساعدك علشان محدش يموت تاني بس السؤال هندخل السم إزاي ..؟؟
وفالآخر قاللي سيب الموضوع ده عليا بعدها بكام ساعة لقيته جايلي وجايبلي علبة سجاير فيها سجارتين
وقاللي : بمجرد متشرب سيجارة من ال2 كل شئ هينتهي
فأنا كتبت المذكرات دي وأديتها لعبدالله علشان ينشرها بعد مأموت
الودااااااااااااااااااااااااااااااااااااااااااااااااااااع
أنا عبدالله زميل مروان أحب أضيف كلمتين بعد ساعة عرفت إن مروان مات خرجنا وراه ودفناه وأنا في الدفنة كنت حاسس إحساس غريب كإن في حاجات حوالينا وأصوات ومحدش سامعها غيري
المهم دفناه وكل واحد روح بيته
أول مرجعت البيت دخلت المطبخ علشان أشوف لقمة أكلها لقيت في وشي حاجة غريبة
صندوق خشب صغير مكتوب عليه عبد الله ياتري أعمل إيه ..؟؟
أفتحه وأنفذ زي مروان وأبقي خادم ليه أو يموتني ..؟؟
ولا أعمل زي ياسر وبرضه أخرها موتي
أنا بفكر في حاجة أرمي الصندوق واللي يلاقيه يلاقيه ويواجه مصيره بقي
وأنا مالي بقي
أنا مالي
أنا مالي